Ceremonia e Diplomimit në FASTIP
Në 29 Tetor 2014, në ambientet e hotel “Harmonia”, 17 Studentëve të diplomuar në shtator 2014 në Fakultetin e Studimeve te Integruara me Praktikën, në Degën Menaxhim Banke, të cilët janë sponsorizuar dhe ofruar praktika pune nga Banka Kombëtare Tregtare gjatë 3 viteve të studimit, iu dorëzuan dje zyrtarisht diplomat.
Banka Kombëtare Tregtare është partneri kryesor nga biznesi për Fakultetin e Studimeve të Integruara me Praktikën (FASTIP) pranë Universitetit “Aleksandër Moisiu”, Durrës. Në këtë program unik Partnershipi Publik-Privat, midis Qeverisë Shqiptare dhe Gjermane, Universitetit të Durrësit dhe Partnerë të Biznesit Shqiptar, BKT luan rolin kryesor në mbështetjen e risive në sistemin e edukimit universitar.
Në këtë aktivitet morën pjesë Znj. Lindita Nikolla, Ministre e Arsimit dhe Sportit si edhe përfaqësues të partnerëve mbështetës të këtij programi.
Z. Seyhan Pencabligil, Drejtori i Përgjithshëm dhe Anëtar i Bordit Drejtues i BKT, në fjalën e tij theksoi se Banka Kombëtare Tregtare do të vazhdojë mbështetjen e studimeve në Degën Menaxhim Banke, jo vetëm këtu por edhe në Kosovë, duke bërë gjithçka që studimet e integruara pranë FASTIP-it, tani dhe në të ardhmen të shënojnë progres, duke e bërë atë një histori të vërtetë suksesi, një shembull për t’u ndjekur nga gjithë bizneset e tjera.